| Il program
Radio::Sheherazade.ch emetta sulettamein cuntegns litterars e surtut prelecziuns dad auturas ed auturs en tuts quater lungatgs naziunals. Quei radio online emetta sulettamein prelecziuns originalas d’auturas e d’auturs (neginas prelecziuns legidas dad acturas ed acturs). Quellas prelecziuns da ca. 30 minutas vegnan introducidas cun ina cuorta descripziun dall’autura/digl autur e da sia ovra.
Pli tard sa ulteriuramein vegnir recepiu el program: intervestas, purtrets, giugs auditivs, referats, extracts da discuors ni era registraziuns dad occurenzas litterars. Ils programs emess vegnan arranschai sin basa da criteris tematics, epocals ni da lungatg.
Effect dureivel: in archiv da tun dalla litteratura svizra
Las prelecziuns ch’ins sa tedlar sin Radio::Sheherazade.ch vegnan registradas specialmein per quei diever. Las prelecziuns vegnan registradas en format digital. La finamira ei da registrar a liunga vesta tontas auturas e tons auturs sco pusseivel.
Igl emprem onn vegnan silmeins 60 prelecziuns cun in cuoz da 30 minutas registradas – quei dat in total da 30 uras program da radio. Sch’il project sa vegnir realisaus e cuntinuaus cun success, vegnan ils onns proxims stediamein novs documents da tun vitier, da maniera ch’ei dat cul temps in archiv litterar da tun.
L’idea ei che tuts tuts commembers digl AdS (Auturas ed Auturs dalla Svizra) duessen figurar en quei archiv.
Plattaforma d’internet
Quei archiv da tun sa vitier adina vegnir consultaus silla plattaforma digl emitur. Sil PodCast e sil RadioBlog da Sheherazade.ch san las novas prelecziuns permanentamein vegnir consultadas.
Colligiaziun
Igl archiv da tun da Radio::Sheherazade vegn colligiaus cul lexicon dallas auturas svizras e dils auturs svizzers digl AdS (www.lexicon.a-d-s.ch) – il consentiment dalla suprastonza digl AdS havein nus gia retschiert.
En futur san semegliontas colligiaziuns cun plattaformas d’autras instituziuns vegnir fatgas: per exempel cun bibliotecas, culla Fonoteca svizra, cullas casas edituras ni schizun cun staziuns da radio tradiziunalas. |